Fjölbreytt dagskrá hjá Fjallafjöri
Updated: Aug 26, 2021
Hjá Fjallafjöri eru nú í boði sex hópar auk byrjendanámskeiðs og því ættu flestir að finna eitthvað við sitt hæfi. Í öllu starfi Fjallafjörs er lögð rík áhersla á öryggi, gleði, samheldni og kærleika enda allir komnir til þess að hafa gaman og njóta lífsins.
Byrjendanámskeið
Á byrjendanámskeiði Fjallafjörs fá þátttakendur fræðslu og þjálfun um fjölbreytta þætti sem gott er að eiga í farteskinu þegar fyrstu skrefin eru tekin í fjallgöngum og ferðamennsku í óbyggðum. Dagskráin inniheldur þrjú fræðslukvöld innandyra, níu gönguferðir og þrjár þrekæfingar undir leiðsögn sjúkraþjálfara. Meðal efnistaka eru búnaður, öryggismál, fatnaður, bakpokinn, veðurspár, undirbúningur ferða og skóreimingar. Fræðslukvöldin eru haldin í Reykjavík.
Fjallabókin, eftir Jón Gauta, auk 5.000 krónu inneignar í gönguhópa Fjallafjörs fylgir námskeiðinu.
Verð: 29.900 krónur. Hægt er að nota Ferðagjöfina hjá Fjallafjöri.
Lágafell
Lágafell er hópur fyrir þau sem vilja njóta náttúrunnar í góðum félagsskap án verulegrar hækkunar, hraða og mikilla áskorana. Flest ættu að geta tekið þátt í Lágafellshópnum, nema einna helst þau sem eru að flýta sér. Um þriggja mánaða dagskrá er að ræða með tólf ferðum - níu kvöldferðum og þremur dagsferðum, auk undirbúningsfundar og gengið er um það bil vikulega. Kvöldferðir eru á mánudögum, brottför klukkan 18:00, og dagsferðir eru á sunnudögum, brottför klukkan 9:30.
Verð: 29.900 krónur. Hægt er að nota Ferðagjöfina hjá Fjallafjöri.
Keilir
Keilishópur Fjallafjörs gengur saman allt árið um kring en tekur gott sumar- og jólafrí. 20 ferðir eru á dagskrá, 10 kvöldferðir og 10 dagsferðir. Meðal ferða á dagskrá starfsársins 2021-2022 eru Kvígindisfell, Vikrafell, Gullbringa, Miðdegishnúkur, Skálafell auk þess sem Keilishópurinn heldur af stað í raðgöngu um Reykjaveg.
Erfiðleikastig ferða í Keilishópnum er 1-2 af 4 mögulegum og fjölbreytni ferðanna er allnokkur. Dagskráin hentar þeim sem geta hreyft sig með góðu móti og eru tilbúin að takast á við fjölbreyttar gönguleiðir á fjöllum.
Verð: 59.900 krónur. Hægt er að nota Ferðagjöfina hjá Fjallafjöri.
Katla
Kötluhópur Fjallafjörs gengur saman allt árið um kring, líkt og Keilis- og Hekluhóparnir, með góðu sumar- og jólafríi. 20 ferðir eru á dagskrá, 10 kvöldferðir og 10 dagsferðir, og meðal ferða á dagskrá eru Geirhnúkur, Strútur, Akrafjall, Prestastígur, Vörðu-Skeggi og Búrfell í Þingvallasveit auk þess sem Kötluhópurinn er að hefja raðgöngu um Kóngsveg. Erfiðleikastig ferðanna er 1-3 af 4 og dagskráin hentar þeim sem þegar hafa tekið sín fyrstu skref í útivist og fjallgöngum og geta tekist á við fjölbreyttar gönguleiðir á fjöllum, talsverðar vegalengdir og hækkanir.
Verð: 59.900 krónur. Hægt er að nota Ferðagjöfina hjá Fjallafjöri.