Rötunarnámskeið Fjallafjörs
Rötun og hagnýt notkun GPS tækja
Fjallafjör býður upp á nýtt og endurbætt 12 klukkustunda námskeið í rötun og notkun GPS-tækja. Á námskeiðinu læra nemendur grunnatriði í kortalestri en megináherslan er á praktíska notkun GPS-tækja. Að námskeiði loknu eiga nemendur að geta unnið með og flutt ferla í GPS-tæki sín og notað tækin sér til gagns.
Rétt er að nefna að á þessu námskeiði er ekki kennt á áttavita en hægt er að bæta við stöku kvöldi í notkun áttavita ef áhugi er fyrir hendi og lágmarksfjöldi þátttakenda næst.
Efni námskeiðisins
Á námskeiðinu er farið yfir grunnatriði í rötun, allar helstu stillingar og notkunarmöguleika GPS-staðsetningartækja, notkun hentugra forrita og kortalestur þar sem m.a. verður horft á stefnur, staðsetningar og vegalengdir auk þess sem gögn eru unnin af kortum og skráð í tækin. Þá verður kennt hvernig gögn á tölvutæku formi eru flutt í og úr tæki og hvernig hægt er að vinna með GPS-gögn í tölvu. Kennslutími er á milli 18 og 22.
Hámarksfjöldi nemenda: 12
Á meðal efnisþátta námskeiðisins eru:
-Grunnatriði rötunar
-Kortalestur
-Stefnur og staðsetning
-GPS tækið, helstu stillingar og valmyndir
-Ferlar - vinnsla og notkun
-Tölvuvinnsla, tengingar og helstu forrit
-Verklegar æfingar
Að námskeiði loknu eiga nemendur að geta notað GPS-tæki og ferla til þess að ferðast eftir og ratað til baka eftir skráðum ferli.
Þátttakendur þurfa að hafa GPS-tæki meðferðis - við mælum með Garmin GPSMAP 62 eða nýrri.
Leiðbeinandi námskeiðisins
Leiðbeinandi námskeiðisins er Guðmundur Örn Sverrisson. Guðmundur hefur yfirgripsmikla reynslu af notkun GPS tækja en hann heldur til fjalla oft í viku sem fararstjóri hjá Fjallafjöri - ávallt með tvö gps tæki meðferðis. Guðmundur hefur reynslu af kennslu á háskóla- og framhaldsskólastigi og kennir útivistar- og rötunartengda áfanga við símenntunarmiðstöðvar.